आदरणीय बुवा,
नमस्ते।
तपाईं बिरामी भएको खबर सुन्दा मेरो मन अत्यन्त दुःखी
र चिन्तित भएको छ। सानैदेखि आमाको अभावमा
तपाईंले मलाई आमा र बुबा दुबैको माया दिएर हुर्काउनु
भयो। तपाईंको त्याग, माया र मेहनत बिना म आजको
अवस्थामा कहिल्यै पुग्न सक्ने थिइनँ। त्यसैले आज तपाईं
बिरामी हुनुहुन्छ भन्ने कुरा मेरो लागि सहनै गाह्रो
भइरहेको छ।
बुवा, तपाईंले सधैं मेरो हरेक इच्छा पूरा गर्नुभयो, मलाई
कहिल्यै केही कमी हुन दिनु भएन। जब म दुःखी हुन्थेँ,
तपाईंले मलाई सम्झाएर हौसला दिनुहुन्थ्यो। तपाईं मेरो
जीवनको सबैभन्दा ठूलो सहारा हुनुहुन्छ। तपाईं बिना
मेरो संसार नै अधुरो लाग्छ।
तपाईंको स्वास्थ्य बिग्रिएको खबरले मलाई भित्रैदेखि
हल्लाइदिएको छ। म टाढा बसेर केही गर्न नसकिरहेको
महसुसले अझ पीडा भइरहेको छ। घरको आर्थिक
अवस्था कमजोर भएकाले तुरुन्तै अस्पताल आउन
सकिरहेको छैन। दाजुहरू हुँदाहुँदै पनि विभिन्न कारणले
तपाईंलाई भेट्न जान नसकेको सुन्दा झन् मन दुखेको छ।
घर जानका लागि यातायातको खर्च पनि पर्याप्त
नभएकाले मलाई अझ कठिन भइरहेको छ।
तर बुवा, कृपया चिन्ता नगर्नुहोस्। यी सबै कठिनाइहरू
हुँदाहुँदै पनि म तपाईंलाई भेट्न आउने प्रतिबद्धता व्यक्त
गर्न चाहन्छु। जस्तोसुकै अवस्था भए पनि म चाँडै
तपाईंको छेउमा पुग्ने प्रयास गरिरहेकी छु। तपाईंलाई
आफ्नो आँखाले देख्ने, तपाईंको हात समाएर बस्ने मेरो
ठूलो इच्छा छ।
तपाईंले आफ्नो ख्याल राम्रोसँग राख्नुहोस्, बुवा। समयमै
औषधि खानुहोस् र पर्याप्त आराम गर्नुहोस्। तपाईं
बलियो हुनुहुन्छ, तपाईंले जीवनका धेरै कठिनाइहरू पार
गर्नुभएको छ, यो अवस्था पनि पक्कै जित्नुहुनेछ भन्नेमा
मलाई पूर्ण विश्वास छ।
बुवा, तपाईंले मलाई सधैं सिकाउनु भयो—हिम्मत हार्नु
हुँदैन भनेर। आज म तपाईंलाई पनि त्यही कुरा सम्झाउन
चाहन्छु। कृपया सकारात्मक रहनुहोस्। म छिट्टै तपाईंको
छेउमा हुनेछु र तपाईंलाई पहिलेझैं स्वस्थ र हाँसिरहेको
देख्ने आशा राखेकी छु।
अन्त्यमा, तपाईं छिट्टै निको हुनुहोस् भन्ने कामना गर्दै यो
चिठी समाप्त गर्छु। कृपया आफ्नो ख्याल राख्नुहोस्। म
छिट्टै आउँदैछु, बुवा।
धेरै माया र सम्मानका साथ,
तपाईंकी छोरी
बिनिशा चेपाङ
